ورال شاھارىنداعى مۇمكىندىگى شەكتەۋلى بالالارعا ارنالعان "شاپاعات" ارناۋلى الەۋمەتتىك قىزمەت ورتالىعى 2009 جىلى اشىلدى. ءبىر قاراعاندا ءبىرتوعا، ءبىرقالىپتى كورىنەتىن مەكەمەنىڭ دە وزىنە ءتان تىنىس-تىرشىلىگى بار. مەكەمەنىڭ ارنايى كولىكتەرى تاڭعى ساعات  سەگىزدەن باستاپ  مۇمكىندىگى شەكتەۋلى بالعىنداردى الىپ كەلەدى ەكەن. وسى ساتتەن باستاپ ورتالىقتاعى  "تاڭشولپان"، "اينالايىن"، "ەركەتاي" توپتارىندا جۇمىس قىزا باستايدى. ەڭ الدىمەن،  بوبەكتەر تاڭعى اسىن ىشەدى. سودان سوڭ، ولاردىڭ كوڭىلىن كوتەرۋ ءۇشىن ماماندارمەن بىرگە جەڭىل جاتتىعۋلار جاسالادى. مەكەمەدەگى ارنايى ماماندار ءار بالامەن كەستە بويىنشا  جۇمىستانادى.  اۋا  رايى جاقسى كەزدەرى تازا اۋادا سەرۋەندەپ، ءتۇرلى ويىندار ۇيىمداستىرۋدا. مەكەمە اۋلاسىندا دا بار جاعداي جاسالعان. تۇسكى اس كەزى دە قاربالاسقا تولى.  بوبەكتەر تاماقتانعان سوڭ جۋىنىپ،  تۇسكى ۇيقىعا جاتادى. العاشىندا تاماق ءىشۋدى،  دۇرىس وتىرىپ،  تۇرۋدى بىلمەيتىن بالالار ءوزى سياقتى بالالارعا قاراپ، بوي تۇزەي باستايدى. تۇستەن كەيىن جوسپار بويىنشا تاربيەشىلەر  تاربيە ساعاتىن وتكىزەدى ەكەن.    كەشكى   ساعات التىدا بالالاردى مەكەمە اۆتوبۋسى ۇيلەرىنە جەتكىزىپ تاستايدى. قىزمەت الۋشى بۇلدىرشىندەردىڭ وز-وزىنە  قىزمەت ەتۋ داعدىلارىن قالىپتاستىرىپ، جەكە دامۋ دەڭگەيىن ارتتىرۋ ارقىلى اتا-انالارىنىڭ جۇمىسقا ورنالاسۋىنا مۇمكىندىك تۋعىزۋ، جانۇيا مۇشەلەرىنە مورالدىق-پسيحولوگيالىق  كومەك كورسەتۋ - مەكەمەنىڭ باستى مىندەتى بولىپ تابىلادى. بۇل  جەردە 1،5-18 جاسقا دەيىنگى پسيحونيەۆرولوگيالىق اۋىتقۋلارى بار جانە تىرەك قوزعالىس اپپاراتى بۇزىلعان بالالار قىزمەت الۋدا. بۇل  ورتالىق  ولارعا  حالىقتى الەۋمەتتىك قورعاۋ سالاسىندا ارناۋلى الەۋمەتتىك قىزمەتتەر كورسەتۋ ستاندارتىنا سايكەس الەۋمەتتىك-مەديسينالىق، الەۋمەتتىك-تۇرمىستىق، الەۋمەتتىك-پسيحولوگيالىق، پەداگوگيكالىق، الەۋمەتتىك-ەڭبەك، الەۋمەتتىك-مادەني، الەۋمەتتىك-ەكونوميكالىق، الەۋمەتتىك-قۇقىقتىق باعىتتا قىزمەت  كورسەتۋدە.

دۇنيە ەسىگىن اشپاي جاتىپ، تاعدىر تالكەگىنە ۇشىراعان بۇلدىرشىندەردىڭ ءوز ورتاسىنا  ەرتەرەك بەيىمدەلۋى ءۇشىن  مەكەمەدە ارنايى ماماندار قىزمەت اتقارادى. ارنايى پەداگوگتار، تاربيەشىلەر مەن پسيحولوگ ماماندارى قىزمەت الۋشىلارعا پەداگوگيكالىق-پسيحولوگيالىق دياگنوستيكالىق زەرتتەۋلەر جۇرگىزەدى. زەرتتەۋ ناتيجەسىندە بالالارمەن جۇرگىزىلەتىن كوررەكسيالىق تۇزەتە-دامىتۋ جۇمىستارىنىڭ نەگىزگى باعىتتارى انىقتالىپ، بالالاردىڭ  وز-وزىنە قىزمەت ەتۋى مەن قيمىل-قوزعالىسىن دامىتۋ، سەنسورلىق داعدىسىن قالىپتاستىرۋ باعىتىندا جۇمىستار جۇرۋدە.  

بالالار ارناۋلى الەۋمەتتىك قىزمەت كورسەتۋ ستاندارتى مەن اۋىر،  كۇردەلى دارەجەدەگى اقىل-ويى كەمىس بالالارعا ارنالعان تۇزەتە-دامىتا وقىتۋ باعدارلاماسى بويىنشا ستاسيونارلىق جاعدايدا قىزمەت الۋدا.  باعدارلاما بالالاردىڭ  زاتتاردى قابىلداۋىن، سويلەۋ ءتىلىن، سەنسورلىق قابىلەتىن، موتوريكاسىن  دامىتۋ، الەۋمەتتىك-تۇرمىستىق باعدارلاۋ باعىتىندا  قۇرىلعان. وسى ماقساتتا مەكەمەدە زاماناۋي قۇرىلعىلارىمەن جابدىقتالعان ەمدىك دەنە شىنىقتىرۋ زالى، سەنسور،  لوگوپەد، دەفەكتولوگتاردىڭ كابينەتى جۇمىس جاسايدى. مادەني، مەرەكەلىك جانە سپورتتىق ءىس-شارالار سپورت زالدا، دەمەۋشىلەردىڭ كومەگىمەن سالىنعان مەكەمە اۋلاسىنداعى جابىق بەسەدكادا  وتەدى.

جىل ساناپ مۇمكىندىگى شەكتەۋلى بالالارعا دەگەن قوعامنىڭ كوزقاراسى وزگەرىپ كەلەدى. ەلباسى ن. ءا. نازاربايەۆ  «قازاقستان جولى - 2050: ءبىر ماقسات، ءبىر مۇددە، ءبىر بولاشاق» اتتى جولداۋىندا «مۇمكىندىگى شەكتەۋلى ازاماتتارعا قامقورلىق كورسەتىلۋى ءتيىس. بۇل ءوزىمىزدىڭ جانە قوعام الدىنداعى ءبىزدىڭ پارىزىمىز» دەپ اتاپ كورسەتكەن ەدى.    وسى باعىتتا  مەكەمەدە ءتۇرلى مەرەكەلىك شارالار مەن تۇزەتە-دامىتۋ جۇمىستارى ءجيى جۇرگىزىلۋدە.

"شاپاعات" ورتالىعىنداعى مۇمكىندىگى شەكتەۋلى بوبەكتەردىڭ  ءار كۇن ماعىنالى ءارى كوڭىلدى وتۋدە.

گۇلىم اقاپ،

باتىس قازاقستان وبلىسى